A hukunta sojan da ya kashe Sheikh Goni –Buhari

Tura wannan Sakon

Shugaban kasa, Muhammadu Buhari ya yi tir da abin da ya kira “kisan babu gaira-babu-dalili da aka yi wa Sheikh Goni Aisami” wanda ake tuhumar wani soja da kashe shi bayan da Shaihin malamin ya rage masa hanya a motarsa, kamar yadda ‘yan sanda suka tabbatar.

Yayin da yake mayar da martani kan lamarin, cikin wata sanarwa da kakakinsa, Mallam Garba Shehu ya fitar, shugaban ya ce “wannan mummunan kisan da sojan ya yi wa wannan mutumin kirkin da ya taimake shi ba hali ne da aka san sojojin kasar nan da shi ba, kuma ya yi hannun riga da horon da aka bai wa sojoji na nuna da’a da girmamawa da kare rayukan wadanda ba su aikata wani laifi ba.”

Shugaba Buhari ya kara da cewa, “a matsayina na babban kwamandan sojojin Nijeriya, na fusata matuka kan wannan mummunan aikin da jami’in tsaro da aka horar domin ya kare rayuka ya aikata.”

Ya kuma yi kira ga hukumomin sojoji da su hukunta wadanda suka aikata wannan kazamin laifin ba tare da bata lokaci ba, sannan su yi waje da ire-iren wadannan sojojin masu mummunan hali.”

A karshe, ya mika sakon ta’aziyya ga gwamnatin jihar Yobe da jama’ar jihar da kuma iyalan Sheikh Goni Aisami.

Leave a Reply

Your email address will not be published. Required fields are marked *