A Sakkwato: Mata 350 sun ci gajiyar asibitin Maryam Abacha

-Masu fama da yoyon fitsari

Musa Lemu Daga Sakkwato

Asibitin mata da ka­nanan yara na Mary­am Abacha dake Sakkwato ya yi wa mata dake da matsalar yankan gishiri watau yoyon fitsari aiki su kimanin 350 cikin majinyata 420 da aka kwantar a dalilin wannan matsala daga shek­arar 2020 zuwa 2021.

Wannan bayani ya fito ne daga bakin shugaban asibitin, Dokta Bello Lawal a lokacin da yake amsa tambayoyin manema Labarai a Sakkwato ranar Talatar da ta gabata

Babban likitan ya ce, sa­mun nasarorin ya biyo bayan nuna kulawar gwamnatin ji­har ga asibitin .

Dokta Lawal ya bayy­ana cewa gwamnatin jihar Sakkwato tare da hadin gwi­war NFPA sun kara inganta asibitin wajan tafiyar da ayyu­kansa na yau da kullum daya kunshi sake fasalin dakunan kwantar da majinyata, ka­zalika da samar da sababbin kayayyakin aiki na zamani.

Babban likitan ya tab­batar cewa a yanzu asibitin ya kasance daya daga cikin asibitocin da za a iya alfahari da su.

Dokta Lawal ya tabbatar cewa likitocin asibitin na gu­danar da ayyukansu na yau da kullum har na tsawon sa’o’i 24 ba tare da nuna gajiya wa ba.

Ya shawarci majinyata da su kasance masu hakuri da dangana tare da nuna buka­tunsu ko kuma korafi ga hu­kumar asibitin tare kuma da bin dukkan dokokin hukumar asibitin.

Ya kara da cewa, hukumar nan dake kasar Turai watau Spotlight tana taimakawa ai­nun tare da hadin gwiwar ma aikatar kula da harkokin mata dake jihar ta fuskar gudanar da wasu gyare- gyare a asibi­tin.

Daga karshe babban liki­tan ya shawarci al’ummar dake mu’amula da asibitin da su ka­sance masu fahimta ga dukkan ayyukan da asibitin ya sanya a gaba na yau da kullum.