Kano ta cim ma nasarar tsabtace muhalli -Masu-ruwa-da-tsaki

Kano ta cim ma nasarar tsabtace muhalli
Tura wannan Sakon

Daga Jabiru Hassan

Babu shakka gwam­natin jihar Kano bisa jagorancin gwamna Dokta Abdullahi Umar Gan­duje tana samun kyawawan nasarori wajen ganin ana tsabtace muhalli tare da ky­autata yanayin guraren zama da kasuwanci a cikin shirin “tsaftar muhalli duk karshen wata”.

Wakilinmu ya hada wani rahoto wanda kuma ya kun­shi jin ra’ayoyin al’ummar gari da masu ruwa da tsaki kan harkar kula da muhalli da kuma na fannin kula da lafiya, inda dukkanin wad­anda suka sami ganawa da Albishir suka bayyana cewa, ko shakka babu, gwamna­tin Ganduje ta ciri tuta ta sha’anin kula da tsabtar mu­halli.

Tun da farko sai da kwamishinan ma’aikatar kula da muhalli, Dokta Kabir Getso ya gudanar da zagay­en ma’aikatu da hukumomin gwamnati, domin ganin yad­da suma suke tafiyar da na su aikin tsabtar muhallinsu a karshen wata, wanda aka fi sani da “Enbironmental Sanitation”, inda ya kan yi bayanai na karfafa gwiwo­yin wadannan ma’aikatu da hukumomin gwamnati dan­gane da kyautata yanayingurarensu na aiki.

A hedikwatar hukumar kula da manyan makaran­tu, watau “ Kano State Polytechnic”, inda kwamishinan ma’aikatar kula da muhallin ya ziyarta kwanakin baya, ya yaba wa shugaban hukumar, Dokta Kabir Bello Dun­gurawa dangane da kokarin da yake yi, wajen ganin ana tsabtace gurin da sauran makaran­tun da ke karkashin kula­war hukumar.

Ya jaddada cewa, gwamnatin Ganduje tana kara daukar matakai na ganin kowane muhalli yana cikan yanayi mai kyau, domin tabbatar da cewa, shirin kula da lafi­ya yana tafiya sosai ganin cewa, sai da kyakyky­awan muhalli ake samun ingantuwar duk wani shiri na kula da lafiya, tare da yaba wa al’ummar jihar Kano, saboda goyon bayan da suke bai wa shi­rin tsabtar muhalli a fadin jihar.

A nasa bangren, shug­aban kwamitin koli na kungiyoyin aikin gayya na jihar Kano, Alhaji Ibrahim Garba Aminu Kofar Na’isa ya bayyana cewa “ a namu bangaren, muna kokari wajen hada kawunan kungiyoyin ai­kin gayya da ke fadin ji­har Kano, wajen gudanar da aikace-aikace musam­man wajen yashe magu­dadun ruwa da kwatoci da yin ciko inda ruwa ke kw­anciya da kuma kwashe shara domin samar da yanayi mai kyau ga mu­hallinmu”.

Ya ce, sai dai suna da bukatar karin kayan aiki, domin ganin kowace kungiyar ta mallaki na ta kayan aikin, ta yadda za’a rika yin ayyuka cikin sauki da sauri, ya gar­gadi al’umma da su daina cushe magudadun ruwa ko yin gini kan hanyoyin ruwa ko kuma jibge kasa ko yashi ko kuma dutse kan hanyar ruwa, wanda hakan yana taimaka wa wajen ambaliyar ruwa musamman da damina.

A karshe, wani dan kungiyar taimakon kai da kai daga karamar hu­kumar Dawakin Tofa, Malam Musa Umar ya yi kira ga kwamitin koli na kungiyoyin aikin gayya na jihar Kano bisa jagorancin Alhaji Ibra­him Garba Aminu Ko­far Na’isa, da ya sanya kungiyoyin aikin gayya na yankunan karkara cikin jadawalin samun kayan aiki idan gwam­nati ta samar, domin a ce­war sa, suna aikin gyaran hanyoyi da yin ciko inda ruwa ke kwanciya da kuma share kasuwanni da makarantu da masallatan Juma’a.

Leave a Reply

Your email address will not be published. Required fields are marked *

Back To Top