Karimatul Islamiyya tana kara bunkasa -Iyayen Yara

Daga Jabiru Hassan

Makarantar Mada­rasatul Karimatul Islamiyya da ke layin Mai’unguwa Musa titin Dan Rimi yankin kara­mar hukumar Fagge tana ci gaba da bai wa yara ilimin addini da na zamani wanda hakan ya sa iyaye da masu rike da yara suke godiya ga makarantar.

Wakilinmu wanda ya ziyarci makarantar ya ru­waito cewa iyayen yara sun nuna gamsuwarsu bisa yadda makarantar take bayar da ilimi ingantacce kuma tun daga tushe wanda hakan ke nunar da cewa daliban makarantar za su ci gaba da kasancewa abin misali duba da yadda suke samun kulawa ta musam­man.

Bugu da kari, madara­satul Karimatul Islamiyya layin Mai’unguwa Musa ta yi fice wajen bayar da tar­biyya da koyar da karatu ga dalibai cikin yanayi mai kyau duba da yadda kowa yake kokarin kai dansa wannan makaranta domin samun ilimi ingantacce da kuma bayar da tarbiyya mai kyau kamar yadda ake gani a yau.

Shugabar makarantar, Malama Binta Idris ta sanar da cewa an kafa makaran­tar ne a shekara ta 2011 da dalibai 7 da kuma malamai guda 2, amma a cewarta, yanzu makarantar tana da dalibai 1,700 da kuma mal­amai 17.

Malama Binta ta kuma jaddada cewa za su ci gaba da bayar da ilimi ga dalibai maza da mata ba tare da nuna gajiyawa ba musam­man ganin yadda al’umma suke yaba wa tsarinsu na bayar da ilimi.

Haka kuma Malama Binta Idris ta gode wa iyaye da malamai da kuma masu tallafa wa makarantar wan­da hakan ya sanya ake ai­kin bayar da ilimi da koyar da tarbiyya ga yara kanana masu tasowa, inda ta yi kira ga mutanen da Allah ya bai wa iko da su taimaka a sami karin ajujuwa a ma­karantar da yin rumfa a ga­ban ajujuwan da ake da su, domin ganin ana ci gaba da rage cunkoso a makarantar.

Daga karshe Malama Binta ta jinjina wa gwamna­tin jihar Kano saboda koka­rin da take yi wajen kyautata yanayin koyo da koyarwa a makarantun jihar Kano, tare da shawartar iyayen yara da su kara bai wa yaransu kwa­rin gwiwar yin karatu tun daga tushe.